Azərbaycan Tibb Universitetinin (ATU) Travmatologiya və ortopediya kafedrasının müdiri, tibb elmləri doktoru, professor Əhməd Əhmədzadə vəfat edib.

Aztibb.az xəbər verir ki, o, uzun sürən onkoloji xəstəlikdən sonra 75 yaşında dünyasını dəyişib.

Qeyd edək ki, Əhməd Əhmədzadə 1970-ci ildə Azərbaycan Dövlət Tibb İnstitutunun (indiki Tibb Universiteti) Müalicə-profilaktika fakültəsini bitirmiş, təyinatla Xaçmaz Rayon Mərkəzi Xəstəxanasında həkim travmatoloq işləmişdir.

1973-cü ildə Moskva şəhərində Mərkəzi Travmatologiya və Ortopediya İnstitutunun kliniki ordinaturasına, daha sonra isə əyani aspiranturaya daxil olmuşdur. 1978-ci ildə tibb elmləri namizədi alimlik dərəcəsini almışdır. O, 1979-cu ildə Azərbaycana qayıdaraq Tibb İnstitutunun Travmatologiya və ortopediya kafedrasında assisent vəzifəsində əmək fəaliyyətini davam etdirmişdir.

1983–1988-ci illərdə Moskva 2 nömrəli Tibb İnstitutunun Travmatologiya və ortopediya kafedrasında doktorantura təhsili almış, 1988-ci ildə doktorluq dissertasiyasını müdafiə etmişdir.

Əhməd Əhmədzadə 1998-ci ildən Azərbaycan Tibb İnstitutunun Travmatologiya və ortopediya kafedrasının müdiri idi. O, ilizarov aparatını Azərbaycanda ilk dəfə tədbiq etmişdi.

Allah rəhmət eləsin!