Cərrah-transplantoloq, tibb üzrə fəlsəfə doktoru Mircəlal Kazıminin rəhbərlik etdiyi tibb heyəti tərəfindən ağır vəziyyətdə müraciət etmiş,  Wilson xəstəliyindən əziyyət çəkən 16 yaşlı Sitarəyə tək müalicə yolu olan qaraciyərin transplantasiyası icra olunub. Sitarəyə onun qardaşı Altay qaraciyərinin bir hissəsini verib.

 

Aztibb.az xəbər verir ki, M.Kazımınin sözlərinə görə, Wilson xəstəliyi qaraciyərin Kupfer hüceyrələrində mis (Cu) ionlarının mübadiləsinin pozulması ilə gedən autosomal-resessiv irsi xəstəlikdir. Xəstəlik zamanı orqanizmdə misin toplanması baş verir ki, bu da ən çox özünü qaraciyər və beyinin zədələnmə əlamətləri ilə göstərir:

 

"Bu xəstəlik qohum nigahlarında sıx görülür. Kişi və qadınlar arasında bərabər tezlikdə təsadüf edilir. Əksər hallarda, Wilson xəstəliyi özünü qaraciyər zədələnməsi şəklində göstərir. Qaraciyərin zədələnməsi xroniki hepatit, sirroz, kəskin qaraciyər çatışmazlığı ilə özünü büruzə verə bilər. Sarılıq, qarında maye toplanması, mədə-bağırsaq qanaxmaları, zəiflik xəstəliyin əsas əlamətlərindəndir. Nevroloji pozulmaların ilkin təzahürü isə tremor, yəni titrəmələrdir. Digər əlamətlər isə çətinləşmiş nitq, hipersalivasiya, hərəkət pozğunluğu, distoniya, spastiklik, əzələ rigidliyi, bükücü kontrakturalar, epileptik qıcolmalardır".

 

Həkimin sözlərinə görə, Sitarə artıq sağalaraq evinə yola salınıb, ailəsinin yanındadır.