Bu gün Azərbaycan Tibb Universitetinin “Təbib” idman klubunun ümumi toplantısı keçirilib.

 

Aztibb.az xəbər verir ki, əvvəlcə “Təbib” idman klubunun sədri, Əməkdar məşqçi, beynəlxalq dərəcəli hakim Qələndər Aslanov gündəlikdə duran məsələləri diqqətə çatdırıb.

 

İclasda idman klubunda işə davamiyyət, nizam-intizam məsələləri müzakirə olunub.

 

İş fəaliyyətinin pandemiya dövrünün tələblərinə uyğun tənzimləndiyini deyən Q.Aslanov klubda nizam-intizamın möhkəmləndirilməsi istiqamətində müvafiq tədbirlərin görüləcəyini bildirib.

 

O, “Təbib” idman klubunda universitetin maliyə imkanlarına uyğun təmir işlərinin görüləcəyini söyləyib. Q.Aslanov məşqçi-müəllimlərin öz ixtisasları üzrə məşqlər aparması məsələsinə də toxunub: “Bildiyiniz kimi, əvvəllər burada müxtəlif idman bölmələri ilə yanaşı, yataqxana tələbələri ilə idman bölməsi də vardı. Artıq bu bölmə olmayacaq. Tələbə hansı idmanla məşğul olursa, biz xüsusi seçimlə onları cəlb edəcəyik. Hər məşqçi-müəllim öz ixtisası üzrə məşqlər aparacaq. Bundan əlavə, bizim məşqçi-müəllimlərimiz öz apardıqları idman bölməsindən başqa digər dərslərə köməkçi müəllim kimi də qatılacaqlar”.

 

İclasda ödənişli xidmət və digər məsələlərlə bağlı müzakirələr aparılıb, suallar cavablandırılıb.

 

Sonda “Təbib” idman klubunun əməkdaşı Nataliya Kərimova uzun illər uğurlu fəaliyyətinə görə və yubiley yaşı münasibətilə "Təşəkkürnamə" ilə mükafatlandırılıb.