Almaniyanın Potsdam şəhərindəki xəstəxanaların birində dörd nəfər qətlə yetirilib, bir nəfər isə ağır yaralanıb.
“Potsdamer Neueste Nachrichten” qəzeti xəbər verir ki, aprelin 28-də axşam saatlarında xəstəxananın müxtəlif palatalarında dörd cəsəd və bir nəfər ağır yaralı aşkarlanıb. Onların pasiyent olub-olmadığı və hansı səbəbdən öldürüldüyü məlum deyil. Faciənin baş verdiyi müəssisə əlillərə qayğı göstərilməsi üçün nəzərdə tutulub.
Polis xəstəxana əməkdaşlarından birini şübhəli şəxs qismində saxlayıb. Cinayətin mümkün motivləri barədə məlumat verilmir. Hadisə qəsdən adamöldürmə kimi qiymətləndirilir. “Bütün cəsədlərdəki zədələnmələr sərt xarici təsir nəticəsində yaranıb”, - deyə polis nümayəndələri bildirib.
Hüquq-mühafizə orqanlarının məlumatına görə, hadisə ilə bağlı təhqiqat başlanılıb.
