Avropa Komissiyası COVID-19 peyvəndinin tədarükündə yaratdığı gecikmələrlə müqaviləni pozduğuna görə "AstraZeneca" dərman şirkətini məhkəməyə verib.

Aztibb.az-ın xarici mediaya istinadən verdiyi xəbərə görə, Avropa Komissiyasının sözçüsü bu barədə mətbuat brifinqində deyib.

Onun sözlərinə görə, Avropa Komissiyası aprelin 23-də dərman şirkətinə qarşı hüquqi iş qaldırıb və bu addım Avropa İttifaqına (Aİ) üzv 27 ölkənin dəstəyi ilə atılıb.

"Müqavilənin bəzi şərtlərinə hörmət edilməyib və şirkət dozaların vaxtında çatdırılmasını təmin etmək üçün etibarlı bir strategiya ilə çıxış etməyib", - deyə Aİ rəsmisi bildirib.

Qeyd edək ki, Aİ bu ilin ikinci yarısında blok ölkələrinə 180 milyon doza peyvəndin verilməsi ilə bağlı  "AstraZeneca" ilə müqavilə imzalamışdı. Bununla da "AstraZeneca" şirkəti dekabr (2020)- iyun (2021) ərzində Aİ-yə ümumilikdə 300 milyon doza peyvənd verməli idi. Lakin mart ayında şirkət bu peyvəndin yalnız üçdə birini verəcəyini bəyan edib.