1986-cı il aprelin 26-da Ukraynada Çernobıl Atom Elektrik Stansiyasında baş verən radiasiya qəzası atom energetikası tarixində ən böyük faciəli hadisə kimi tarixə düşüb.

 

Aztibb.az xəbər verir ki, radiasiya sızması nəticəsində çox böyük itki və tələfat baş verib. Atom elektrik stansiyasındakı qəza nəticəsində nüvə reaktoru tamamilə sıradan çıxıb və ətraf mühit radiasiya təsiri altına düşüb. Qəza hadisənin baş verdiyi ərazidən 30 kilometr radiusda Rusiya, Belarus və bir sıra Avropa ölkələrinə də təsirsiz ötüşməyib. Ukraynanın 12 vilayətində 50 min, Belarusda 46,5 min, Rusiyanın 19 vilayətində 60 min kvadratkilometr ərazi ekoloji çirklənməyə məruz qalıb və 2,6 milyon nəfər radiasiya təhlükəsi altına düşüb.

 

Həmin qəza zamanı alim, fəhlə, hərbçi və könüllülər öz həyat və sağlamlıqlarını təhlükə altına qoyaraq fəlakətin miqyasının genişlənməməsi üçün böyük qəhrəmanlıq və fədakarlıq nümunəsi göstəriblər. Çernobıl Atom Elektrik Stansiyasında baş verən dəhşətli qəza XX əsrin ən böyük ekoloji fəlakəti hesab olunmaqla yanaşı, həm də bir daha belə bir fəlakətə yol verilməməsi üçün ibrət dərsi sayılmalıdır.

 

Birləşmiş Millətlər Təşkilatı aprelin 26-nı Beynəlxalq Radiasiya Qəzaları və Fəlakətləri Qurbanlarının Xatirəsinin Anım Günü elan edəndən sonra 2003-cü ilin dekabrında BMT Baş Assambleyası həmin qərarı dəstəkləyib və təşkilata üzv ölkələri həmin günü qeyd etməyə çağırıb.