Məlum olduğu kimi, bu gün Prezident İlham Əliyevin imzaladığı fərmanla Səhiyyə Nazirliyi haqqında Əsasnamədə dəyişiklik edilib və Səhiyyə nazirinin birinci müavini vəzifəsi təsis edilib. Həmçinin dövlət başçısının digər sərəncamları ilə Teymur Yusif oğlu Musayev Azərbaycanın Səhiyyə nazirinin birinci müavini təyin edilib, Səhiyyə nazirinin vəzifələrini müvəqqəti icra etmək səlahiyyəti ona tapşırılıb.

Aztibb.az xəbər verir ki, Teymur Musayev 1987–94-cü illərdə Azərbaycan Tibb Universitetində tibb təhsili alıb. O, 2003–2004-cü illərdə Strastburq Universitetində "Laparoskopik cərrahiyyə" ixtisası üzrə təhsilini davam etdirib, ardınca isə Latviyada “Riga Stradins” Universitetində Sağlamlığın idarəedilməsi üzrə magistratura pilləsini bitirib.

T.Musayev 2007-2015-ci illərd Tusi adına Klinikanın direktoru olub. 2015-2018-ci illərdə “Dobromed” klinikasına rəhbərlik edib. Həmçinin 2016-2019-cu illərdə Qəbələ şəhərində yerləşən “Chenot Palace” Sağlamlıq Mərkəzinin direktoru işləyib.

2019-2020-ci illərdə İtaliyada fəaliyyət göstərən “Medwellness&SPA” mərkəzinin baş beynəlxalq məsləhətçisi olub.

O, 2020-ci ildən bugünkü təyinatına qədər Səhiyyə Nazirliyinin Səhiyyənin təşkili şöbəsinin müdiri vəzifəsində çalışıb.