“Peyvənd COVID-19 xəstəliyindən özümüzü və yaxınlarımızı qorumağın ən etibarlı üsuludur”. 

Aztibb.az-ın məlumatına görə, bunu Mərkəzi Gömrük Hospitalının terapevti Nazilə Xəlilbəyova deyib. O, bildirib ki, COVID-19 xəstəliyi hər hansı xroniki xəstəliyi olan insanlar üçün xüsusilə təhlükəlidir. Bu halda həm də fəsadların, ağırlaşmaların inkişaf riski yüksəkdir. Ona görə də bütün dünyada həkimlər yanaşı xəstəlikləri olan insanlara vaksinasiyadan keçməyi tövsiyə edirlər.

N.Xəlilbəyovanın sözlərinə görə, dünyanın 100-dən artıq ölkəsində əhaliyə 500 milyondan artıq peyvənd vurulub. Lakin ayrı-ayrı ölkələrdə vaksinasiya sürəti fərqlidir. Bəzi ölkələrdə əhalinin çoxu vaksini 2 dozada qəbul edib, peyvənd ehtiyatları da kifayət qədərdir. Digər ölkələrdə isə hələ vaksinin ilk partiyaları çatdırılmayıb.

Həkim qeyd edib ki, pandemiya dövründəki bu vaksinasiya – tarixdə ən irimiqyaslı vaksinasiya proqramıdır: “Onun məqsədi planetdə hər bir yaşlı insanı  COVID-19 əleyhinə peyvənd etməkdir. Bir sıra yoxsul ölkələr Ümumdünya Səhiyyə Təşkilatının rəhbərliyi altında beynəlxalq proqram - COVAX-dan vaksin gözləyirlər. Fevralın 24-də Afrika qitəsində bu proqram çərçivəsində ilk olaraq Qana vaksin alıb. COVAX 2021-ci ilin sonuna qədər 2 milyard doza vaksin çatdırmağı planlaşdırır.

İsraildə və Böyük Britaniyada isə vaksinasiyadan sonra təsdiq olunub ki, peyvənd yoluxmaları və ölüm hallarını xeyli azaldır. Azərbaycanda vaksinasiyaya bu il yanvarın 18-də başlanılıb. Ölkədə vurulan vaksinlərin ümumi sayı 1 381 967, birinci mərhələ üzrə vaksinasiya olunanların ümumi sayı 917 877, ikinci mərhələ üzrə isə 464 090 təşkil edir". 

Terapevt qeyd edib ki, hətta COVID-19-dan sağalmış sağlam insanlar da yenidən virusa yoluxa və onu yaya bilərlər. Ona görə də təhlükəsizlik qaydalarına, hər şeydən əvvəl maskalardan istifadəyə, gigiyena məsələlərinə ciddi riayət edilməli və sosial məsafənin saxlanması həm vaksinasiyadan əvvəl, həm də sonra gözlənilməlidir.