Xəstələrə toxunma hissini vermək üçün əllərinə bağlanan isti su ilə doldurulmuş tibbi əlcək fotosu sosial mediada böyük marağa səbəb olub. Aztibb.az xəbər verir ki, bu təqlid Braziliyada xüsusi rejimli xəstəxanaya yerləşdirilən COVID-19 xəstələrinə edilib. Minlərlə insanın paylaşdığı fotoşəkilə əksər izləyicilər “Tanrının əli” şərhini yazıb. Xəstələrə bu tərzdə dəstək olmanın artıq geniş yayıldığı da bildirilib.

Həkim-epidemioloq Erik Feiql-Dinq fotonu sosial mediada paylaşıb. “COVID-19-un varlığına inanmayanların hadisələri və ölümləri də inkar etməsinə imkan verməyin. Pandemiyaya son qoyaq”, - deyə çağırış edib. O, xüsusi rejimdə saxlanılan xəstələrin yanlarında kimsəsi olmadan vəfat etdiyini, lakin ölüm öncəsi yaxınlarının toxunuşunu arzuladıqlarını və bu hissi təqlid etmək üçün tibb bacılarının əlcəkləri isti su ilə doldurub xəstələrin əlinə bağladıqlarını bildirib.  

Bu metod ölüm halını azalda bilər 

“Reanimasiyada olan xəstələrdə qavrayış, mühakimə və düşüncə pozğunluğu əlamətlərinin yaranmasının əsas səbəblərindən biri onların sosial təcrid edilməsidir. Düşünürəm ki, bu metod hətta ölüm hallarını da azalda bilər”, – deyə psixiatr Veysi Çeri bildirib.

Yenilik deyilmiş

Fotoda əks olunan metod kütləvi olaraq sosial media izləyiciləri tərəfindən yenilik kimi qiymətləndirilsə də, mütəxəssislər bunun tibbdə çoxdan tətbiq olunduğunu deyiblər. Məlum olub ki, həmin tibbi metod periferik qan dövranı və hipotermiyası pozulmuş xəstələr üçün tətbiq olunur. Odur ki, yenilik deyil. Hətta intubasiya olunmuş xəstələrin əl və barmaqlarında oynaq sərtliyinin qarşısını almaq üçün də bu üsuldan istifadə edilir.