Koronavirus infeksiyasına yoluxan hər 3 nəfərdən biri psixoloji və ya nevroloji xəstəliklərlə üz-üzə qalır.

Aztibb.az xəbər verir ki, bununla bağlı “Lancet Psychiatry” tibbi jurnalında yayımlanan məqalədə bildirilib.

ABŞ-da 240 minə yaxın insan üzərində aparılan tədqiqata əsasən, COVID-19-a tutulanların yüzdə 34-də yoluxmadan sonra, altı ay ərzində nevroloji və ya psixoloji xəstəliklərin əlamətləri aşkar olunub.

Nevroloji xəstəliyin əlaməti daha çox COVID-19 səbəbiylə xəstəxanaya yerləşdirilənlərdə görülüb. Belə xəstələrin hər 50 nəfərindən biri beyində qan damarlarının daralması və ya tıxanması ilə qan axınının azalması səbəbindən insult keçirib.

"Nəticələrə əsasən beyin xəstəlikləri və ya psixiatrik xəstəliklər COVID-19-dan sonra qrip və ya tənəffüs yolları xəstəlikləri ilə müqayisədə daha çox ortaya çıxdı. Ancaq bunun əsaslı səbəbi müəyyən edilə bilmədi", – deyə məqalədə bildirilib.

Xəstələrdə, həmçinin yuxu pozğunluğu, tromboz nəticəsində infarkt və beyin qanaması da təsbit edilib.           

Məqalədə qeyd olunub ki, başlanğıcda koronavirus xəstəliyi yalnız qızdırma, öskürək və nəfəs darlığı kimi simptomlarla bilinirdisə, sonrakı dönəmdə orqanlarda zədələnmə, dəridə dəyişikliklər, həzm, beyin və sinir sistemi xəstəliklərinin əlamətləri də müəyyən olunub. Eyni zamanda, COVID-19 xəstələrində əzələ ağrısı, baş ağrısı, başgicəllənmə, qoxu və dad hissinin itməsi əlamətlərinin də yaşandığı məlumdur.