ABŞ-ın Xəstəliklərə nəzarət və onların profilaktikası üzrə mərkəzinin direktoru Roşel Valenski bildirib ki, koronavirusun Britaniyada aşkar edilən daha yoluxucu ştammı Birləşmiş Ştatlarda üstünlük təşkil edir.

Aztibb.az xəbər verir ki, Valenski Ağ evdəki çıxışında deyib: “Xəstəliklərə nəzarət və onların profilaktikası üzrə mərkəzin müşahidələri nəticəsində alınan son dəyərləndirmələrimizə görə, Birləşmiş Ştatlarda dövr edən B-117 Britaniya ştammı hazırda koronavirusun daha çox yayılan formasıdır”.

Valenski onun fikirlərini təsdiqləyən statistik məlumatları hələ ki, təqdim etməyib. Lakin mərkəzin son məlumatına görə, fevralın sonlarından martın ortalarınadək olan dövrdə B-117-yə yoluxmaların faizlə sayı azı iki dəfə artıb. Fevralın sonunda bütün yoluxmaların təqribən 11 faizi B-117 variantının payına düşürdü, lakin martın ortaları üçün bu göstərici 27 faizədək yüksəlib.

Ekspertlər hesab edirlər ki, koronavirusun B-117 variantı daha yoluxucudur və ehtimal ki, daha ölümcüldür. Əhalinin geniş vaksinlənməsinə baxmayaraq, yoluxma və ölüm hallarının sayının getdikcə artması belə deməyə əsas verir.