Azərbaycan Tibb Universitetinin Tədris Cərrahiyyə Klinikasında daha bir xəstə ana olmaq sevincini yaşayıb.

 

Aztibb.az xəbər verir ki, klinikanın cərrah ginekoloqu Fərhad Sultanovun sözlərinə görə, 51 yaşlı qadının uşaqlıq boşluğunu deformasiya edən miomaları laparoskopik üsulla götürülsə də, bir il sonra bu xanım əkiz sağlam uşaqlar dünyaya gətirib.

 

Cərrah F.Sultanov qeyd edib ki, bir il öncə həmin xanım uşaqlıq boşluğunu deformasiya edən intramural-submukoz miomalar diaqnozu ilə klinikaya müraciət edib: “Pasiyentin yaşını nəzərə alaraq, ona histeroektomiya (uşaqlığın götürülməsi) əməliyyatı təklif olunub. Xəstə isə ana olmaq arzusunda olduğunu, bu səbəbdən də uşaqlığı saxlamağı israrla xahiş edib. Aparılan müayinələr və klinik hal imkan verdiyinə görə, xəstədə laparoskopik miomektomiya əməliyyatı icra edilərək uşaqlıq saxlanılıb”.

 

Bundan sonra xəstə süni mayalanma ilə əkiz dölə hamilə qalıb və hamiləliyi 35 həftəyə qədər çatdırıb. Ana bətnində uşaqların çəkiləri 2.300 kq (qız) və 2.200 kq (oğlan) olub.  Laparoskopik üsulla 3 ədəd mioma götürülmüş uşaqlıq nəinki 1 döllü, hətta iki döllü hamiləliyi davam etdirə bilib. Həmçinin döllərin ümumi çəkisi 5 kq-a yaxın olan hamiləliyi 35 həftəsinə qədər saxlayıb və  “ruptura uteri” (uşaqlığın yırtılması) fəsadlaşması təhlükəsi də olmayıb.

 

F.Sultanov bildirib ki, bu fakt “hamilələrdə laparoskopik miomektomiyadan sonra ruptura təhlükəsi daha çox olur” kimi yanlış fikirlərə bir cavabdır. Sadəcə götürülən miomanın yatağını düzgün bərpa etmək vacibdir. Bunun laparotomiyada olduğu kimi, laparoskopiyada da icrası mümkündür.

 

Həkim hesab edir ki, yaşından asılı olmayaraq sağlamlığı imkan verən hər bir qadın ana olmaq sevincini yaşamalıdır: “Bu sevinci yaşamayan qadınlarda mütləq göstəriş olmadan, yalnız yaşına görə uşaqlığı götürmək düzgün deyil. Ümumiyyətlə, bütün əməliyyatlar sığortalanmaq xatirinə deyil, göstəriş əsasında olmalıdır".