Ümumdünya Səhiyyə Təşkilatının (ÜST) rəhbəri və bir sıra dünya liderləri qlobal pandemiyalara hazırlığın artırılması üzrə beynəlxalq müqavilənin hazırlanmasına çağırıblar. 

Aztibb.az xəbər verir ki, onların bəyanatında COVID-19 pandemiyasının "hər kəsin müdafiə olunmayacağına qədər heç kəsin özünü təhlükəsiz hiss edə bilməməsinə" xəbərdarlıq olduğu bildirilir.

Bəyanatı ÜST-ün Baş direktoru Tedros Qebreyesusla yanaşı, Fransa, Almaniya, Böyük Britaniya, İspaniya, Portuqaliya, Ukrayna, Çili, Keniya, İndoneziya və Cənubi Koreya də daxil olmaqla, 20-dən çox ölkənin liderləri imzalayıblar.

Onlar koronavirus pandemiyasını İkinci Dünya müharibəsindən sonra qlobal ictimaiyyətə "ən böyük çağırış" adlandırıblar və bəşəriyyəti yeni pandemiyalar və səhiyyə sahəsində yeni fövqəladə halların gözlədiyini vurğulayıblar. "Məsələ bunun baş verib–verməyəcəyində deyil, bunun nə vaxt baş verəcəyindədir", - deyə bəyanatda bildirilir.

"Biz birgə səylərimizlə pandemiyaların proqnozlaşdırılmasına, qarşısının alınmasına, aşkar edilməsinə, təhlil edilməsinə daha yaxşı hazırlaşmalıyıq və yaxşı əlaqələndirilmiş tədbirlər görərək, onlara effektiv reaksiya verməliyik", - deyə dünya liderləri hesab edirlər.

Bu sahədə beynəlxalq müqavilə ölkələr arasında əməkdaşlığı möhkəmləndirməyə, bu cür problemlərin həllinə kompleks yanaşmanın işlənib hazırlanmasına, milli, regional və qlobal səviyyədə pandemiyalara hazırlığın artırılmasına imkan verəcək.

"COVID-19 zəifliyimiz və fikir ayrılıqlarımızdan istifadə edib. Biz hazırkı məqamdan istifadə etməliyik – qlobal birlik kimi birləşməli və bu böhran çərçivəsindən kənara çıxan dinc əməkdaşlığa başlamalıyıq", – deyə bəyanatda bildirilir.

ÜST-ün mətbuat konfransında çıxış edərək doktor Tedros Qebreyesus qeyd edib ki, pandemiya zamanı bəşəriyyət həm ən yaxşı, həm də ən pis tərəfdən özünü göstərib. Belə ki, məsələn, həkimlər bütün dünyada inanılmaz cəsarət və fədakarlıq nümayiş etdirdilər, lakin eyni zamanda bir çox ölkədə sosial bərabərsizlik dərinləşdi, hakimiyyət institutlarına olan inam azaldı.

"Pandemiyanın cəmiyyətimizə, iqtisadiyyatımıza, sağlamlığımıza təsiri, xüsusilə də söhbət ən yoxsul və müdafiəsiz insanlardan gedəndə, böyük idi", – deyə ÜST rəhbəri bildirib. O, vurğulayıb ki, hazırkı vəziyyət beynəlxalq ictimaiyyətdən qətiyyətli hərəkətlər tələb edir.

Tedros Qebreyesus, pandemiyaya hazırlığın artırılmasına dair beynəlxalq müqavilənin, peyvənd kampaniyaları və cavab tədbirlərinin vaxtında maliyyələşdirilməsi da daxil olmaqla, bu cür tədbirlərə bərabər ümumi çıxış imkanını nəzərdə tutduğunu bildirib.

Yekun qərarı ÜST-ün üzv-ölkələri verəcəklər, deyə doktor Tedros Qebreyesus bildirib. "Belə bir müqavilə necə hazırlanacaq, ona nə daxil olunacaq, onun ratifikasiya olunub–olunmaması ÜST-ünn üzv-dövlətləri, yəni dünya xalqlarının işidir", - deyə o bildirib.

"Biz uşaqlarımıza daha təhlükəsiz dünyanı miras qoymalıyıq", – deyə ÜST-nin rəhbəri çıxışını yekunlaşdırıb.