Ümumdünya Səhiyyə Təşkilatı (ÜST) koronavirus epidemiyasının yaranma səbəblərinə dair hesabatını açıqlayıb.
Yanvar ayında Çinə səfər etmiş ekspert qrupunun rəylərinin də yer aldığı hesabatda epidemiyanın mənbəyinə dair ehtimallara aydınlıq gətirilib. Hesabatda göstərilib ki, SARS-CoV-2 virusu ilkin olaraq yarasalarda yaranıb və insana birbaşa deyil, aralıq daşıyıcı olan digər heyvanlar üzərindən keçib. ÜST pandemiyanın yaranma səbəbi kimi “laboratoriya qəzası“ tezisinin mümkünlük ehtimalını isə olduqca aşağı qiymətləndirib.
Rəydə virusun yarasalardan başqa bir heyvana və onlardan da insanlara keçməsinin ”ehtimal olunandan daha yüksək” səviyyədə olduğu qeyd olunub. Aralıq daşıyıcının hansı heyvan növünün olması barədə isə elmi dairələrdə ortaq fikir yoxdur və hesabatda da bu suala aydınlıq gətirilməyib.
Qeyd edilməlidir ki, bu ilin yanvar ayında Çinə səfər edən ekspert heyətinin tərkibində zoologlardan epidemiologlara qədər müxtəlif ixtisaslar üzrə mütəxəssislər iştirak ediblər. Mütəxəssislər heyəti Çinin Uxan vilayətində yerli həmkarları ilə birlikdə epidemiyanın başlanğıc nöqtəsinin nədən ibarət olmasına dair tezislər araşdırıblar.
2019-cu ilin sonunda dünyada sürətlə yayılmağa başlayan koronavirusa yoluxanların sayı 127 milyon nəfəri ötüb, virusla əlaqədar ölənlərin sayı isə 2,78 milyon nəfərdir.