COVID-19 pandemiyasına qarşı mübarizədə Azərbaycana davamlı texniki dəstəyin tərkib hissəsi kimi Avropa İttifaqı (Aİ) və Ümumdünya Səhiyyə Təşkilatının (ÜST) birgə layihəsi ölkəmizdəki bir sıra xəstəxanalarda İPN (COVID-19 infeksiyası üçün spesifik olan profilaktika və nəzarət-red.) tədbirlərinin qiymətləndirilməsini aparıb. Bu barədə ÜST-ün Azərbaycan nümayəndəliyindən məlumat verilib. 

Avropa İttifaqının maliyyələşdirdiyi Sağlamlıq üçün Həmrəylik Təşəbbüsünün tərkib hissəsi kimi baş tutan qiymətləndirmə ÜST-ün Azərbaycandakı Nümayəndəliyi tərəfindən Səhiyyə Nazirliyi və TƏBİB-lə birgə təşkil edilib. Bildirilib ki, qiymətləndirmə missiyası ölkənin müxtəlif bölgələrindəki on xəstəxana, o cümlədən Bakıda iki, Şamaxıda bir və münaqişədən zərər çəkmiş ərazilər kimi Bərdə, Tərtər, Ağdam, Ağcabədi və Füzuli rayonlarında yerləşən yeddi xəstəxananı əhatə edib. Missiya üzvləri qeyd edilən tibb müəssisələrində xəstələrin skrininq və triajı, reanimasiya, doğum, sterilizasiya və cərrahiyə şöbələri, eləcə də tibbi tullantılarının idarə olunmasına dair tədbirlərin qiymətləndirilməsini həyata keçirib. Münaqişədən zərər çəkmiş rayonlardakı xəstəxanaların direktorları ilə İPN tədbirlərilə bağlı ehtiyacların qarşılanmasında ən effektiv dəstək yolları müzakirə edilib və bu ərazilərdə çalışan 100-dək səhiyyə işçisinə qiymətləndirmə zamanı müəyyən edilimiş prioritet istiqamətlər üzrə təlim keçilib.

Qiymətləndirmə missiyası Səhiyyə Nazirliyi və TƏBİB nümayəndələri və ÜST ekspertlərinin iştirakı ilə 10-11 mart tarixlərində Bakıda keçirilən iki günlük seminarla başa çatıb. Seminarda ölkənin İPN-ə dair texniki sənədləri müzakirə edilib və ÜST ekspertlərinin bu sahədəki tövsiyələri təqdim edilib. Missiyanın və müzakirələrin nəticəsi olaraq İPN sahəsində ölkəyə dəstəyinin davam etdirilməsi, o cümlədən tibb müəssisələrinin maarifləndirici posterlərlə təmin edilməsi, xəstəxanalarda əl sanitariyası punktlarının yaradılması, ÜST-ün İPN-ə dair texniki sənədlərinin Azərbaycan dilinə tərcüməsi və yayılması və yerli səhiyyə işçiləri üçün vebinarlar silsiləsinin keçirilməsi qərarlaşdırılıb.