İngiltərə və İsveçin koronavirus əleyhinə birgə hazırladıqları “AstraZeneca” vaksini təhlükəsizdir və nəzarət orqanları onun tətbiqinin nəticələrini izləyir.

Aztibb.az “The Guardian” qəzetinə istinadla xəbər verir ki, bu barədə Böyük Britaniyanın səhiyyə naziri Mett Henkok bildirib.

“AstraZeneca şirkəti və Oksford Universitetinin vaksini təhlükəsizdir və biz bilirik ki, ölkəmizdə bu preparatla 10 milyondan çox insan peyvənd edilib. Bunu Britaniyanın nəzarət orqanları, Ümumdünya Səhiyyə Təşkilatı və Avropa tənzimləyicisi də bildirir”, - deyə nazir qeyd edib.

“Biz daim onun effektivliyini qiymətləndirir və bu vaksinin Birləşmiş Krallıqda insanların həyatını xilas etdiyini bilirik”, - deyə Mett Henkok əlavə edib.

Bir qədər öncə bəzi Avropa ölkələri, o cümlədən Almaniya, Fransa, İtaliya və İspaniya “AstraZeneca” vaksininin tətbiqinin dayandırılması barədə qərar qəbul etmişdi. Buna peyvənd edilən bəzi insanlarda tromb əmələ gəlməsi səbəb olmuşdu. Sonradan Avropanın Dərman Preparatları üzrə Agentliyinin icraçı direktoru Emer Kuk bildirmişdi ki, “AstraZeneca” preparatının faydası onun yan təsirlərini üstələyir.

“AstraZeneca” şirkətinin məlumatına görə, hazırda Avropa İttifaqı ölkələrində və Böyük Britaniyada 17 milyon insan bu preparatla peyvənd olunub. Bununla yanaşı, ötən həftəyə olan məlumata görə, təxminən 40-dan da az pasiyentdə tromblaşma müşahidə edilib.