Braziliya prezidenti Jair Bolsonaru Kardioloqlar Cəmiyyətinin prezidenti doktor Marsel Keyroqun Səhiyyə naziri vəzifəsində Eduard Pazuellunu əvəzlədiyini elan edib.
Bu barədə Aztibb.az “İnterfaks”-a istinadən xəbər verir.
"Bu gün günorta Marsel Keyroqu (səhiyyə naziri-red) təyin etmək barədə qərar qəbul olunub. Onu artıq bir neçə ildir tanıyıram. Keyroqda Pazuellunun gördüyü işi yaxşı həyata keçirmək üçün hər şey var", - Bolsonaru bildirib.
Braziliya prezidentinin sözlərinə görə, Keyroq özünün işçi komandasını seçəcək və keçid prosesi bir-iki həftə sonra olacaq.
"Marsel Keyroq səhiyyə məsələləri ilə bağlı çox yaxşı məlumatlandırılıb. O, bütün dünyanı sarsıdan bu xəstəlikdən ölən insanların sayını azaltmaq üçün tədbir görməyə hazırlaşır", - Bolsonaru əlavə edib.
Qeyd edək ki, Keyroq Braziliyada COVID-19 pandemiyası ərzində prezident səhiyyə naziri təyin etdiyi dördüncü şəxsdir.
