Bakı Sağlamlıq Mərkəzi bu günlərdə "Facebook" sosial şəbəkəsində paylaşılmış “xəstə uşağın ayaqlarına rentgen aparatının düşməsi” barədə xəbərə münasibət bildirib. 

 

Paylaşımda rentgen texniki tərəfindən uşağın ayaqları üzərinə rentgen aparatının düşdüyü iddia edilib. 

 

"Bildirmək istərdik ki, tibb müəssisəmizdə istismarda olan stasionar rentgen aparatları ştativə bağlı cihazlardır və hər hansı bir hissənin düşmə ehtimalı yoxdur. Qeyd edilən məsələ ilə bağlı xəstə uşağın yaxınları tərəfindən də müəssisəmizə hər hansı bir müraciət və ya şikayət daxil olmayıb. Bu məsələ barədə tərəfimizdən sosial şəbəkə vasitəsilə məlumat əldə edilib. Belə ki, tibb müəssisəmiz haqqında verilən hər bir ictimai rəy bizim üçün önəmlidir", - deyə Mərkəzdən vurğulanıb. 

 

Qeyd olunub ki, Bakı Sağlamlıq Mərkəzi Səhiyyə Nazirliyinin tabeliyində olan publik hüquqi şəxs kimi əsas fəaliyyəti əhalinin sağlamlığının keşiyində durmaq, onların qayğısına qalmaq və keyfiyyətli tibbi xidmət göstərməkdir.

 

"Övladı xəstə olan ailənin vəziyyəti və körpə balamızın sağlamlığı bizim üçün çox önəmlidir. Ağ xalatın məsuliyyətini daşıyan bütün tibb işçiləri kimi, bizim kollektivimiz də azyaşlının vəziyyətinə xüsusi həssaslıq və ürək ağrısı ilə yanaşır. Qısa müddət ərzində uşağın valideynləri ilə əlaqə yaradılıb görüşüləcək və məsələ ciddi şəkildə araşdırılıb, lazımı tədbirlər görüləcək".