“Mənə daha çox ünvanlanan suallardan biri də bağırsaq qanaxmasının törəmə səbəbindən olub-olmaması ilə bağlıdır”.

Bu sözləri ümumi cərrah, koloproktoloq Türkan Gündüz bağırsaq qanaxmaları barədə Aztibb.az-a müsahibəsində deyib.

- Bağırsaq qanaxması törəmə səbəbindən ola bilərmi? Bu, necə müəyyən edilir və əlamətləri hansılardır?

- Bağırsaq qanaxması törəmələr nəticəsində də baş verə bilər. Öncə xəstədə nəcisə getməkdə çətinliklər yaranır, bağırsaq qanaması baş verir. Yalnız düzgün müayinə edildikdən sonra bunun hansı səbəbdən baş veməsi müəyyən edilir.

- Bu zaman hansı müayinə vacibdir?

- Əgər düz bağırsaq xərçəngindən şübhələniriksə, xüsusi güzgülər – anoskoplar vasitəsilə baxaraq, biz bu xəstəliyi təyin edə bilirik. Əgər törəmə düz bağırsağın yuxarı hissəsindədirsə, mütləq şəkildə rektoskopik, yaxud da kolonoskopik müayinə şərtdir. Yalnız bu müayinələrdən sonra müəyyən olunur ki, burada bağırsaq törəməsi, yaxud bağırsaq xorası var və qanaxmanın səbəbi babasil, anal çat, yoxsa bağırsaq polipidir.

- Düz bağırsaq xərçəngi müşahidə edildikdə hansı yol izlənilir?

- Əgər düz bağırsaq xərçəngi varsa, bağırsağın re-zeksiyasını – əməliyyatını icra edirik və anostomoz, yaxud da stoma qoyuruq.  Bu zaman isə hər xəstəyə görə individual əməliyyat taktikası seçilir.

- Bağırsaq qanaxmasından əziyyət çəkənlərə nə məsləhət verərdiniz?

- Erkən qoyulmuş diaqnoz insan həyatını xilas edə bilər. Ona görə də, bu kimi problemləri olanlar gecikdirmədən həkim-mütəxəssisə müraciət etməlidir.