Martın 11-də Azərbaycan Tibb Universitetinin Tədris və müalicə işləri üzrə prorektoru, professor Sabir Əliyev “Təbib” idman” klubuna yeni sədr təyin olunan Qələndər Aslanovu kollektivə təqdim edib.

 

Əvvəlcə uzun illər universitetin Bədən tərbiyəsi və idman kafedrasına (“Təbib” idman klubu) rəhbərlik edən, bu yaxınlarda dünyasını dəyişən professor Kamal Kəbirlinskinin xatirəsi bir dəqiqəlik sükutla yad edilib.

 

Professor Sabir Əliyev K.Kəbirlinskinin Azərbaycan Tibb Universitetinin idman tarixindəki müstəsna xidmətindən söz açıb. Bildirib ki, onun rəhbərliyi altında universitet respublikanın ali təhsil məktəbləri arasında idmanın ayrı-ayrı növləri üzrə keçirilən yarışlarda dəfələrlə birincilik qazanıb.

 

İdman sahəsində nailiyyətlərin əldə edilməsini həm də kollektiv arasında olan səmimi münasibətin nəticəsi kimi dəyərləndirən professor S.Əliyev mövcud ənənənin bundan sonra da qorunacağına inamını ifadə edib. O, klubun sədri vəzifəsinə Əməkdar məşqçi, beynəlxalq dərəcəli hakim Qələndər Aslanovun təyin olunduğunu diqqətə çatdırıb. Yeni sədrin kifayət qədər pedaqoji təcrübəyə malik olduğunu, eyni zamanda, idman sahəsində yadda qalan uğurlara imza atdığını deyən prorektor Qələndər Aslanova gələcək fəaliyyətində uğurlar arzulayıb.

Mərasimdə universitetin Həmkarlar İttifaqı Komitəsinin sədri, dosent Cahangir Qasımov, “Təbib” idman klubunun əməkdaşları Nərgiz Mehdiyeva, Cəlal Babayev, Ələkbər Əliəfsərov və Aybəniz Əliyeva çıxış edərək təyinatı münasibətilə Qələndər Aslanovu təbrik edib, ona yeni vəzifəsində uğurlar arzulayıblar.