Avropa İttifaqı (Aİ) qlobal vaksin proqramı olan COVAX-a 1 milyard avro dəstək göstərəcək.

Aztibb.az xarici KİV-ə istinadən xəbər verir ki, Aİ Komissiyasının rəhbəri Ursula von der Leyen Afrikadakı vaksinasiya işləri üçün də əlavə olaraq 100 milyon avro dəstək təmin edəcəklərini açıqlayıb.

Onun sözlərinə görə, bu, vaksinə ədalətli və bərabərhüquqlu əlçatanlığı təmin etmək məqsədi daşıyır:

“Yalnız bütün dünya təhlükəsizlikdə olduqda, biz də təhlükəsizlikdə olacağıq. Çatdırılma yaxında başlayacaq”.

Von der Leyen xatırladıb ki, Aİ daha əvvəl vaksinasiya üçün 500 milyon avro kömək göstərməyi öhdəliyinə götürmüşdü, ancaq bu məbləğ 1 milyard avroyadək artırılıb.

Qeyd edək ki, COVAX proqramı koronavirus vaksinlərinin dünyanın varlı və kasıb ölkələrinə bərabər, sürətli və ədalətli şəkildə paylanmasını nəzərdə tutur.