Müxtəlif dərman bitki preparatları qızılca, insan rotavirus və rinovirusları (İRV), tənəffüs sintsitial (TSV) virusu, çoxsaylı viruslar qrupu, neurotropik Sindbis virusu (NSV), müxtəlif polioviruslar, ümumiyyətlə insanlar arasında ciddi infeksiyalara səbəb olan B virusların qarşısını almaq kimi bir potensiala malikdir. Hər hansı bir bitki preparatının antiviral təsirini sübut və ya təkzib etmək üçün molekulyar səviyyədə tədqiqatların aparılması zəruridir.

Bu məlumatı Aztibb.az-a açıqlamasında AMEA Botanika İnstitutunun Etnobotanika laboratoriyasının müdiri, biologiya elmləri doktoru, professor Səyyarə İbadullayeva verib.

O, bildirib ki, dünyada bu sahədə fitokimyəvi maddələrin terapevtik xüsusiyyəti ilə bağlı tədqiqatlar çox azdır. Lakin molekulyar səviyyədə antiviral  xüsusiyyətlərin öyrənilməsi istiqamətində bir sıra maraqlı eksperimentlər aparılmalıdır: “Belə misallardan biri mürəkkəbçiçəklilərin nümayəndəsi olan Stevia rebaudiana bitkisinin isti-sulu ekstraktının molekulyar səviyyədə  tədqiqatıdır. Bu bitki ekstraktı əsas şəkər tərkib hissəsi olan uron turşusu ilə 9800 molekulyar çəkisi olan bir anion polisaxaridin təsiri ilə  İRV yoluxucu serotiplərini hüceyrələrdə blok edir. Eynilə MA-104 hüceyrələrində yayılan İRV-nin RNT sintezini inhibire edən Haemanthus albiflos növündən alınmış alkaloid ekstraktını misal göstərmək olar”.

S.İbadullayeva qeyd olunan bütün məlumatlara əsaslanaraq, dərman bitkilərindən müxtəlif infeksiya əleyhinə preparatlar, xüsusən də antiviral dərmanların alına biləcəyini qeyd edib. “Dərman bitkilərinin potensial anti-infeksion xüsusiyyətlərini müəyyənləşdirməyə yönəlmiş skrining proqramlarını farmakologiyanın inkişafı sahəsində böyük bir potensial hesab etmək olar”, – deyə alim əlavə edib.