Sübut axtarmaq məqsədilə yanvarın 14-də Çinin Hubei əyalətinin paytaxtı Uhan şəhərinə gələn Ümumdünya Səhiyyə Təşkilatının (ÜST) tədqiqatçıları ilk xəstələrin çoxunun müalicə aldığı xəstəxanalara, 2019-cu ilin dekabrında o vaxt bilinməyən virus hallarının aşkar edildiyi dəniz məhsulları bazarında olublar.
Aztibb.az xarici KİV-lərə istinadla xəbər verir ki, səfərdən sonra qrup üzvü Peter Daşak jurnalistlərə “həqiqətən yaxşı, həqiqətən vacib bir görüş” olduğunu bildirib. Digər təfərrüatlar haqqında məlumat verilməyib.
Komandanın topladığı sübutlar, gözlənildiyi kimi, uzun müddət axtarılan cavaba əlavə olacaqdır. Epidemiyanın səbəbkarı olan heyvanların mənbəyinin aşkar edilməsi, heyvan nümunələrinin götürülməsi, genetik analiz və epidemioloji tədqiqatlar da daxil olmaqla çox böyük həcmdə araşdırma tələb edir.
Çin ciddi test və kontaktların izlənməsi yolu ilə daxili ötürülməni əhəmiyyətli dərəcədə məhdudlaşdırıb. Maskanın istifadə edilməsi ictimai yerlərdə, demək olar ki, hər yerdə müşahidə edilir, yerli sakinlər və hətta yoluxma hallarının aşkar edildiyi bütöv şəhərlər mütəmadi olaraq bu qaydaya riayət edirlər.
Buna baxmayaraq, Çində yanvar ayında ölkə daxilində COVID-19-a 2000-dən çox yeni yoluxma halı qeydə alınıb ki, bu da keçən ilin mart ayında Uhanda baş vermiş ilk epidemiyanın son mərhələsindən bəri ən yüksək aylıq göstəricidir. Yanvar ayında bu xəstəlikdən iki nəfər dünyasını dəyişib, bunlar Çində bir neçə ay ərzində COVID-19 səbəbi ilə ilk qeydə alınmış ölüm hallarıdır.