3 yaşlı Elay keçən ilin noyabr ayında qarın ağrısından şikayəti ilə həkimə aparılıb və onun çox ağır bir xəstəliyə tutulduğu müəyyən olunub. Balaca Elay əməliyyat edilib və sol böyrəyi ilə dalağı götürülüb.

Elayın atası Elxan Cahandarovun sözlərinə görə, əvvəllər Elayın səhhəti ilə bağlı heç bir şikayəti olmayıb: "Noyabr ayında uşaq iki gün ardıcıl olaraq qarın ağrısından şikayət etdi və biz onu sahə həkiminə apardıq. Orada müayinədən sonra məlum oldu ki, sol böyrəyinin 90%-ni tamamilə tutan və aydın olmayan törəmə var. MRT müayinəsindən sonra sol böyrəkdə Vilms törəməsi aşkar olundu. Milli Onkologiya Mərkəzində sol böyrəkdə əmələ gələn şişin böyrəyin fəaliyyətini dayandırması səbəbindən orqanın tamamilə çıxarılmalı olduğu bildirildi. Uşaq dərhal əməliyyat olundu. Həkimin dediyinə görə, şiş böyrəkdən dalağa da keçdiyi üçün məcbur qalıb dalağı da götürdülər”.

Hazırda uşağa 28 həftə kimyaterapiya və 14 gün şüa təyin olunduğunu deyən Elayın atası müalicə xərclərini qarşılamaq üçün xeyirxah insanlardan yardım istəyir:

“Buna qədərki prosedurları qohum və dostların köməyi, dəstəyi ilə həyata keçirdik. Hətta bəzi tanışlardan borca pul da götürdüm. Lakin artıq Elayın müalicəsini davam etdirməyə imkanımız yoxdur. Bu sınaqdan çıxmağımız, Elayın sağalması üçün xeyirxah, mərhəmətli insanlardan kömək istəyirik. İnanırıq ki, səsimizə səs verənlər tapılacaq və Elayımız tezliklə sağlamlığına qovuşacaq”.

Fotolarda bank rekvizitlərini təqdim edirik.

Elxan Cahandarov (Elayın atası): (050) 999-96-29