Sabah səhər saatlarında yeni növ koronavirusla (COVID-19) mübarizə tədbirləri çərçivəsində ikinci partiya (10 milyon doza) vaksinin birinci hissəsi Çindən Türkiyəyə gətiriləcək. 

Aztibb.az məlumatına görə, Türkiyənin səhiyyə naziri Fəxrəddin Qoca “Tvitter”də bununla bağlı paylaşım edib. 

Sabah Türkiyəyə 6,5 milyon doza vaksin gətiriləcək. 

Qeyd edək ki, "Sinovac" şirkətinin "CoronaVac" vaksini inaktiv peyvənddir. Türkiyə Çinin “Sinovac” şirkəti ilə bağladığı müqaviləyə əsasən, 10 milyon doza “CoronaVac" vaksininin ilk mərhələdə 3 milyon dozası 30 dekabr 2020-ci ildə Türkiyəyə gətirilib. Türkiyə Əczaçılıq və Tibbi Cihazlar Agentliyinin iki həftəlik analizindən sonra yanvarın 13-dən başlayaraq öncə səhiyyə işçiləri və Türkiyə Prezidenti Rəcəb Tayyib Ərdoğan başda olmaqla, bir çox dövlət rəsmiləri, sonra isə yaşı 65-dən yuxarı olanlar peyvənd edilməyə başlanıb. İndiyədək ölkədə 1 milyon 200 mindən çox insana peyvənd vurulub.

Nazir bildirib ki, 6,5 milyon doza vaksin də analiz edildikdən iki həftə sonra tətbiq olunacaq.