Bakı şəhərində COVID-19 xəstəxanalarında doluluq səviyyəsi 30-35, rayonlarda isə 20%-ə enib.

Aztibb.az-ın məlumatına görə, bunu Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı deyib.

Onun sözlərinə görə, reanimasiya şöbələrindəki yataqlarda doluluq faizi isə hələ də yüksəkdir:

“Digər ölkələrdə də bu vəziyyəti görmək olar. Dünyada xəstəliyin yoluxma sürəti məhdudlaşdırılıb, lakin xəstəliyin ağır keçməsi tendensiyası var. Buna görə də reanimasiya yataqlarında doluluq var”.

Boş çarpayı sayının sürətlə artmasına səbəb olan amillər haqqında danışan R.Bayramlı qeyd edib ki, əvvəl orta çarpayı günü 14-15 gün təşkil edirdi:

“Amma təcrübə qazandıqca, xəstəliyin gedişatı barədə tibbi məlumatlar çoxaldıqca xəstələri daha erkən evə yaza bilirik. Bəzi xəstəxanalarda bu müddət artıq 7 günədək enib. Bir sıra xəstəxanalarda isə bu müddət 8-10 gündür. Təlimlər keçdikcə bu rəqəmi daha da aşağı sala biləcəyik".