Qida Təhlükəsizliyi İnstitutu qida təhlükəsizliyinin təmin edilməsi məqsədilə mütəmadi olaraq laboratoriyalar şəbəkəsinin genişləndirilməsi, eləcə də laboratoriyaların maddi-texniki bazasının gücləndirilməsi sahəsində tədbirlər həyata keçirir.

Ölkədə istehsal edilən, idxal və ixrac olunan qida məhsullarının, eləcə də aqrokimyəvi və baytarlıq preparatları kimi qeyri-qida məhsullarının, həmçinin qablaşdırma materiallarının təhlükəsizlik və keyfiyyət göstəriciləri üzrə müayinələrinin aparılması üçün Qida Təhlükəsizliyi İnstitutunun laboratoriyaları müasir cihazlarla təchiz edilib. Hazırda institutun Analitik Ekspertiza Mərkəzinin tabeliyində fəaliyyət göstərən Kompleks Tədqiqatlar Laboratoriyasında analizin aparılması üçün müasir, yüksək həssaslığa malik unikal cihazlardan istifadə edilir.

Bu ilin yanvar ayında laboratoriya qida məhsullarında kənar maddələrin və bioloji fəallığa malik qida əlavələrində tərkib təyini, baytarlıq preparatlarında təsiredici və köməkçi maddələrin, baytarlıq preparatları və pestisidlərdə təsiredici maddələrin, metal qablaşdırma materiallarında element tərkibinin təyini üçün cihazlarla təchiz edilib.

Bununla yanaşı, xromatoqrafik analizlərdə nümunə hazırlığını asanlaşdırmaq və həssaslığı artırmaq üçün laboratoriyanın avadanlıqları sırasına ekstraksiya robotu əlavə edilib.