Cənubi Koreyada əhalinin yeni növ koronavirusa (COVID-19) qarşı peyvəndlənməsinə gələn ilin fevralında başlanılacaq.

Aztibb.az xəbər verir ki, bunu Cənubi Koreya Prezidenti Mun Ce-in yerli jurnalistlərə açıqlamasında bildirib. Hökumətin kifayət qədər peyvənd tədarükü edə bilməməsi və əhalinin vaksinasiyasının gecikə biləcəyi ilə bağlı narahatlıqlarla razılaşmadığını deyən Mun Ce-in bildirib ki, hökumət vaksinasiya ilə bağlı bir neçə ay əvvəl qəbul etdiyi proqramı planlı şəkildə icra edir.

Dövlət başçısı ilkin mərhələdə tibb işçiləri də daxil olmaqla xüsusi risk qrupundan olan şəxslərə peyvənd vurulacağını, bu məqsədlə kifayət qədər vaksin alındığını açıqlayıb.

Bir müddət əvvəl Cənubi Koreyanın səhiyyə qurumlarının rəsmiləri 36 milyon adamın vaksinasiya olunması üçün "AstraZeneca", "Janssen" və "Pfizer" şirkətlərindən peyvənd alınması ilə bağlı müqavilələr imzalandığını, habelə "Moderna" şirkəti ilə müqavilənin imzalanma ərəfəsində olduğunu bildiriblər.

Qeyd edək ki, bəzi mütəxəssislər hazırda Cənubi Koreyada COVID-19 pandemiyasının 3-cü dalğasının müşahidə olunduğu qənaətindədirlər. Rəsmi statistikaya əsasən, noyabrın ortasından başlayaraq gündəlik təsdiqlənmiş yoluxma sayı davamlı artır. Dekabrın 25-də isə sutkalıq antirekord (1237 yoluxma) qeydə alınıb.