Səhiyyə Nazirliyinin nümayəndələri COVID-19 risk kommunikasiyası ilə bağlı keçirilən virtual görüşdə iştirak ediblər.

Nazirliyin mətbuat xidmətindən Aztibb.az-a bildirilib ki, onlayn formatda keçirilən konfransda Ümumdünya Səhiyyə Təşkilatı, BMT, UNICEF, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, İctimai Səhiyyə və İslahatlar Mərkəzi və Beynəlxalq Qırmızı Xaç Komitəsinin nümayəndələri çıxış ediblər.

Məruzəçilər peyvəndlərin cəmiyyətdə daha asan qəbulu üçün nüfuzlu şəxslərlə əməkdaşlıq etməyi, həmçinin peyvəndlərin əhəmiyyətini vurğulayan rəsmi şəxslərlə bu təşəbbüsü başlamağın daha məqsədəuyğun olduğunu bildiriblər.

Qeyd edilib ki, peyvəndləri təbliğ edərkən, gözləntiləri nəzərə almaq və tələbat və əlçatanlıq məsələsi arasında balansı qorumaq əsas şərtlərdən biridir.

Konfrans iştirakçıları peyvəndləmə başlasa belə, risk kommunikasiyasına davam etmək və virusdan qorunmağın yolları barədə mütəmadi şəkildə mesajlar verməyi, fiziki məsafə saxlamağın vacibliyini daha çox vurğulamağı xüsusi diqqətə çatdırıblar.

Görüşdə, həmçinin mövcud vəziyyəti qiymətləndirmək, sorğular vasitəsilə əhalinin peyvəndlərlə bağlı fikirlərini öyrənmək, səhiyyə işçilərinə inam daha çox olduğundan onlar vasitəsilə peyvənd təbliğatını aparmaq kimi məsələlərə toxunulub.