Avropa İttifaqı (Aİ) üzv ölkələrə Böyük Britaniyaya vacib olmayan səyahətləri dayandırmağı tövsiyə edib. Qurum, həmçinin məcburi səyahətlərin həyata keçirilməsini, tədarük zənciri problemlərinin yaranmaması üçün uçuşların və qatarların hərəkətinin bərpa olunmasını məsləhət görüb. Buna səbəb isə Krallıqda qida çatışmazlığının yarana biləcəyi riskidir.

Aztibb.az xəbər verir ki, komissiyanın ədliyyə sahəsi üzrə mütəxəssislərindən biri olan Didye Reynders İttifaq üzvlərinin virusun yayıldığı ilk zamanlardan haqlı olaraq Britaniyaya uçuşları dayandırdıqlarını bildirib. Qeyd edib ki, lakin bu, minlərlə Aİ və Britaniya vətəndaşının ölkələrinə qayıtmasına mane olmamalıdır.

Nəqliyyat komissarı Adina Valean nəqliyyat işçilərinin məhdudlaşdırma və karantin kimi bütün profilaktik tədbirlərdən azad edilməli olduğunu vurğulayıb.

Komissiyanın tövsiyəsinə baxmayaraq, Aİ ölkələri sərhəd nəzarətində milli siyasətlərini həyata keçirməkdə sərbəstdirlər.