Türkiyənin “Habertürk” telekanalının köşə yazarı Kamal Öztürk Çin istehsalı peyvənd vurdurduqdan sonra koronavirusa yoluxub.

Aztibb.az xəbər verir ki, o, bu barədə Fox TV-də teleproqrama telefon vasitəsilə qoşularkən bildirib.

K. Öztürk 17 dekabrda koronavirus testindən keçdiyini və testin neqativ nəticələndiyini bildirib.

19 dekabrda Çin şirkəti “Sinovac” şirkətinin istehsal etdiyi “CoronaVac” peyvəndini vurdurduğunu bildirən K. Öztürk iki gün sonra bəzi əlavə təsirlərin müşahidə olunduğunu qeyd edib. O, dekabrın 22-si yenidən koronavirus testindən keçib, nəticə pozitiv çıxıb.

K. Öztürk bildirib ki, yetərli qoruma yaratmaq üçün peyvəndin 14 gün fasilə ilə 2 dəfə vurulması nəzərdə tutulub. 

“Birinci peyvənd dozasından sonra bədən 14 gün ərzində anticisim istehsal etməyə başlayır, ancaq bu, immunitet yaratmaq üçün kifayət deyil. Buna görə ikinci doza 14 gün sonra verilir. İkinci peyvənd dozasından 14 gün sonra bədən artıq virusa müqavimət göstərən anticisim səviyyəsinə çatır. Bu nə deməkdir? Bədənim ilk peyvənd dozasından 28 gün sonra virusa qarşı çox güclü immunitet qazanmış olardı. Ancaq bu müddətdə hər an virusa yoluxmaq ehtimalım var idi”,- deyə Öztürk qeyd edib.