Bakı şəhərində fəaliyyət göstərən Şuşa Rayon Mərkəzi Xəstəxanasında 8 Noyabr – Zəfər Gününə həsr olunmuş tədbir keçirilib.

Bu məlumat Aztibb.az-a Şuşa RMX-dan verilib.

Bildirilib ki, tədbirin əvvəlində Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Daha sonra xəstəxananın direktoru Mətanət Bünyadova, II Qarabağ müharibəsi qazilərinin anaları Hüsniyyə Ələkbərova və Vəzifə Qurbanova, eləcə də İctimaiyyətlə əlaqələr üzrə mütəxəssis Gülgün Gündüz çıxış ediblər.

Çıxışlarda Zəfər tariximizin əhəmiyyəti, Vətən uğrunda göstərilən qəhrəmanlıq və milli birliyimizin gücü vurğulanıb. İştirakçılar 8 Noyabr – Zəfər Günü münasibətilə hər kəsi qürur və fəxarət hissi ilə təbrik ediblər.

Tədbirdən sonra xəstəxananın kollektivi Bakı şəhərində yerləşən 8 Noyabr abidəsini və 44 günlük Vətən müharibəsinə həsr olunmuş muzeyi ziyarət edərək Zəfər tariximizin unudulmaz səhifələrini ehtiramla yad ediblər.