Azərbaycan Tibb Universitetinin (ATU) nümayəndələri xalqımızın azadlığı, suverenliyi və torpaqlarımızın ərazi bütövlüyü uğrunda canlarından keçmiş qəhrəmanlarımızın xatirəsini yad etmək məqsədilə Şəhidlər xiyabanını ziyarət edib.

Bu barədə Aztibb.az-a ATU-dan bildirilib.

Qeyd olunub ki, ziyarət zamanı ATU-nun Hərbi tibb fakültəsinin bir qrup şəxsi heyəti, o cümlədən zabit, müəllim və kursant heyəti 44 günlük Vətən müharibəsində misilsiz rəşadət göstərərək şəhidlik zirvəsinə ucalan əziz həmvətənlərimizin, həmçinin döyüş meydanında yaralı əsgər və zabitlərimizə tibbi xidmət göstərərək qəhrəmancasına həlak olan hərbi tibb işçilərinin məzarlarına baş çəkib. Məzarlar üzərinə güllər düzülüb, onların əziz xatirəsi bir dəqiqəlik sükutla yad edilib.

44 günlük Vətən müharibəsində hərbi həkimlər və tibb xidməti əməkdaşları ön cəbhədə atəş altında gecə-gündüz fədakarlıqla çalışaraq minlərlə döyüşçünün həyatını xilas edib, adlarını zəfər tariximizə qızıl hərflərlə yazdırıblar.

Gələcəyin hərbi həkimləri olan kursantlar üçün bu cür ziyarətlər vətənpərvərlik ruhunun yüksəldilməsi, hərbi andına və peşə borcuna sədaqətin möhkəmləndirilməsi baxımından xüsusi əhəmiyyət kəsb edir.