Azərbaycan Respublikası Ailə, Qadın və Uşaq Problemləri üzrə Dövlət Komitəsi ilə Səhiyyə Nazirliyi İctimai Səhiyyə və İslahatlar Mərkəzinin (İSİM) birgə əməkdaşlığı çərçivəsində Emal Sənayesi üzrə Bakı Dövlət Peşə Təhsil Mərkəzində tələbələrin iştirakı ilə tədbir təşkil olunub.

 

İSİM-dən Aztibb.az-a bildirilib ki, Ailə, Qadın və Uşaq Problemləri üzrə Dövlət Komitəsinin əməkdaşı Rafiq Mahmudov çıxışında sağlam cəmiyyətin və güclü genofondun formalaşmasının məhz gənclərin fiziki və psixoloji baxımdan sağlam inkişafından asılı olduğunu bildirib. O, gənclərin erkən yaşlardan maarifləndirilməsinin və nikahdan öncə tibbi müayinədən keçməsinin ölkənin demoqrafik təhlükəsizliyi üçün xüsusi əhəmiyyət kəsb etdiyini diqqətə çatdırıb.

 

İSİM-in həkim-metodisti Teymur Ağazadə “Kişilərin reproduktiv sağlamlığı” mövzusunda çıxış edərək yeniyetmə və gənclərə zərərli vərdişlərin orqanizmə təsiri, fərdi gigiyena qaydaları, cinsi yolla keçən infeksiyalar barədə ətraflı məlumat verib. O, tütün, spirtli içkilər və narkotik maddələrin reproduktiv sistemdə yarada biləcəyi fəsadları vurğulayaraq, gəncləri sağlam həyat tərzi seçməyə səsləyib.

 

Yekunda suallar cavablandırılıb və iştirakçılara reproduktiv sağlamlığın qorunmasına dair tövsiyələr verilib.