Ürək-damar cərrahı, tibb üzrə elmlər doktoru, Milli Məclisin deputatı Rəşad Mahmudov Bakıda keçirilən Türk Dünyası və Qonşu Ölkələrin Beynəlxalq Tibb Elmləri Konqresində iştirak edib.

Aztibb.az xəbər verir ki, bu barədə Rəşad Mahmudov sosial şəbəkə hesabında paylaşım edib.

Aspendos Academy tərəfindən təşkil olunan konqresin rəsmi açılış mərasimində iştirak edən deputat “Klinik protokolların səhiyyədə tətbiqi: elmi sübutlardan klinik qərarlara və mövcud çağırışlar” mövzusunda elmi məruzə ilə çıxış edib.

Məruzədə müasir tibbdə elmi sübutlara əsaslanan klinik protokolların əhəmiyyəti, onların gündəlik tibbi praktikaya inteqrasiyası zamanı qarşıya çıxan çətinliklər və mövcud problemlərin həlli yolları diqqətə çatdırılıb.

Rəşad Mahmudov qeyd edib ki, müasir səhiyyənin inkişafı yalnız yeni texnologiyaların tətbiqindən deyil, həm də elmi biliklərin düzgün klinik qərarlara çevrilməsindən asılıdır. Onun sözlərinə görə, klinik protokolların əsas məqsədi həkimin qərarvermə imkanlarını məhdudlaşdırmaq deyil, elmi sübutları klinik təcrübə ilə birləşdirərək pasiyentlərə daha təhlükəsiz, effektiv və keyfiyyətli tibbi xidmət göstərilməsinə dəstək verməkdir.

Deputat vurğulayıb ki, bu cür beynəlxalq elmi platformalar ölkələr arasında tibbi bilik və təcrübə mübadiləsinin genişlənməsinə, ortaq elmi əməkdaşlıqların inkişafına və səhiyyə sistemlərinin təkmilləşdirilməsinə mühüm töhfə verir.

Rəşad Mahmudov konqresin təşkilatçılarına təşəkkür edib, iştirakçılara səmərəli müzakirələr və tədbirin işinə uğurlar arzulayıb.