Sumqayıt Tibb Mərkəzinin (STM) tabeliyində fəaliyyət göstərən 1 nömrəli Ailə Sağlamlıq Mərkəzində (ASM) hamilə və yeni ana olmuş qadınlar üçün ana südü ilə qidalanmaya dair maarifləndirici tədbir keçirilib.

 

Mərkəzdən Aztibb.az-a verilən xəbərə görə, tədbirdə STM-nin direktor müavini, İlkin səhiyyə xidmətinin rəhbəri Namirə Abbasova, 1 nömrəli ASM-nin baş həkimi Təranə Mansurova və Əziz Əliyev adına Azərbaycan Dövlət Həkimləri Təkmilləşdirmə İnstitutunun Pediatriya kafedrasının dosenti Mətanət Qaraxanova iştirak ediblər.

 

Namirə Abbasova ana və uşaq sağlamlığının qorunmasında ilkin səhiyyə xidmətinin rolundan, maarifləndirmə işinin əhəmiyyətindən danışıb. O, qadınların hamiləlik dövründən başlayaraq düzgün məlumatlandırılmasının və doğuşdan sonra körpəyə qulluq və qidalanma məsələlərində davamlı dəstək almasının vacibliyini vurğulayıb.

 

Mətanət Qaraxanova ana südünün körpənin sağlam böyüməsi və inkişafındakı rolu, həm ana, həm də uşaq sağlamlığı üçün faydaları barədə ətraflı məlumat verib. Ana südü ilə qidalanmanın düzgün təşkili, əmizdirmə zamanı yarana bilən çətinliklər və bu prosesdə analara dəstəyin əhəmiyyəti diqqətə çatdırılıb.

 

Görüş zamanı iştirakçıları maraqlandıran suallar cavablandırılıb, mövzu ilə bağlı tövsiyələr verilib.

 

Tədbir hamilə qadınların və yeni ana olmuş qadınların məlumatlılığının artırılması, körpələrin sağlam qidalanmasının təşviqi məqsədi daşıyıb.