Azərbaycanda köməkçi məhsullara əlçatanlığın genişləndirilməsi və köməkçi texnologiyaların ilkin səhiyyə xidmətlərinə inteqrasiyasının gücləndirilməsi istiqamətində tədbirlər həyata keçirilir. 

Aztibb.az xəbər verir ki, bu barədə TƏBİB məlumat yayıb.

Bildirilib ki, Azərbaycan Respublikasının Səhiyyə Nazirliyi, Əmək və Əhalinin Sosial Müdafiəsi Nazirliyi, TƏBİB və Ümumdünya Səhiyyə Təşkilatının (ÜST) Azərbaycan nümayəndəliyinin əməkdaşlığı ilə həyata keçirilən Köməkçi Məhsullar üzrə Təlim (TAP) proqramı çərçivəsində TƏBİB-in tabeliyindəki tibb müəssisələrinin əməkdaşları üçün mərhələli şəkildə təlimlər təşkil olunub.

Nəzəri və praktiki təlimlər tibb işçilərinin fiziki məhdudiyyəti olan şəxslərin ehtiyaclarını müəyyənləşdirmək, uyğun köməkçi vasitələri seçmək və müvafiq xidmətlərə yönləndirmək bacarıqlarının artırılmasına yönəlib. Köməkçi vasitələrə təkərli oturacaqlar, optik eynəklər, eşitmə cihazları, əsalar və bu fəsildən olan digər məhsullar daxildir. 

2025-ci ildən mərhələli şəkildə həyata keçirilən proqram çərçivəsində Bərdə və Şamaxı rayon mərkəzi xəstəxanalarının, eləcə də Gəncə Şəhər Birləşmiş Xəstəxanasının nəzdindəki Abbas Səhhət adına Xəstəxananın əməkdaşları olmaqla ümumilikdə 120 tibb işçisi təlimlərə cəlb olunub.

Qeyd edək ki, təlimlər ÜST-nin Azərbaycan dilində də istifadəyə verilmiş “Learning on TAP” rəqəmsal platformasındakı Köməkçi Texnologiyalar Kursu əsasında təşkil olunub:  https://www.gate-tap.org/course-list/assistive-technology