Səhiyyə Nazirliyi İctimai Səhiyyə və İslahatlar Mərkəzi (İSİM) və Azərbaycan Uşaq Nevroloqları Assosiasiyasının birgə təşkilatçılığı ilə “Uşaqlarda epilepsiya üzrə klinik protokolun təqdimatı”na həsr olunmuş elmi-praktik konfrans keçirilib.

 

İSİM-dən Aztibb.az-a verilən məlumata görə, konfransın məqsədi uşaqlarda epilepsiyanın diaqnostikası, təsnifatı, müalicəsi və uzunmüddətli idarə olunması üzrə hazırlanmış klinik protokolun təqdim edilməsi, səhiyyə mütəxəssislərinin protokolun tətbiqi ilə bağlı bilik və bacarıqlarının artırılması, eləcə də müasir elmi sübutlara əsaslanan yanaşmaların klinik praktikaya inteqrasiyasının təşviq edilməsi olub.

 

Konfrans çərçivəsində müxtəlif sessiyalar üzrə tibb üzrə fəlsəfə doktorları Ramin Rzayev, Nailə Abbasova, Mahirə Məmmədova, Şəhla Mehdiyeva, Fərid Məmmədbəyov, Rahim Əliyev, Şəhla Məlikova və Sevda Ələkbərovanın moderatorluğu ilə epilepsiyanın diaqnostikası və müalicəsi istiqamətində aktual məsələlər müzakirə edilib.

 

İSİM-in Metodiki şöbəsinin müdiri Billurə Yusifova, tibb elmləri doktoru, professor, Azərbaycan Tibb Universitetinin (ATU) Nevrologiya kafedrasının müdiri Aytən Məmmədbəyli, tibb üzrə fəlsəfə doktorları Nailə Abbasova, Sona Əliyeva, Mədinə Tağıyeva və Yaqut Hüseynli, eləcə də həkimlər Ülkər Mürsəlova, Leyla Rəhimova, Samirə İsmayılova və Günel Lətifova geniş təqdimatla çıxış ediblər.

 

Çıxışlarda neonatal və infantil dövrlərin, uşaqlıq və yeniyetməlik yaşlarının epileptik sindromları, epilepsiyanı təqlid edən qeyri-epileptik paroksizmal vəziyyətlər, epilepsiya və neyroinkişaf pozğunluqları və digər mövzular barədə ətraflı məlumat verilib. Klinik halların müzakirəsi zamanı xəstəliyin müxtəlif təzahürləri və diaqnostik yanaşmalar diqqətə çatdırılıb.

 

Konfrans Səhiyyə Nazirliyi tərəfindən 8 DTT balı ilə akkreditasiya olunub.