Ağcabədi Rayon Mərkəzi Xəstəxanasında tibb işçilərinin peşəkar inkişafının dəstəklənməsi, tibbi xidmətin keyfiyyətinin yüksəldilməsi və keyfiyyət mədəniyyətinin gücləndirilməsi məqsədilə “Tibb işçisinin peşəkar davranış qaydaları” mövzusunda təlim keçirilib.

 

Ağcabədi RMX-dan Aztibb.az-a verilən xəbərə görə, baş tibb bacısı, böyük tibb bacıları və tibb bacılarının iştirak etdiyi təlim zamanı tibbi etika və deontologiya, pasiyentlərlə düzgün və etik ünsiyyət, pasiyent hüquqlarının və şəxsi məlumatların məxfiliyinin qorunması, peşəkar məsuliyyət, komanda işi və davranış mədəniyyətinin tibbi xidmətin keyfiyyətinə təsiri ilə bağlı məsələlər müzakirə olunub.

 

Qeyd edilib ki, tibbi xidmətin keyfiyyəti yalnız müəyyən edilmiş standartların tətbiqi ilə deyil, həm də hər bir tibb işçisinin peşəkar davranışı, pasiyentlərə həssas və hörmətli münasibəti, eləcə də təhlükəsiz tibbi xidmət göstərilməsi istiqamətində məsuliyyəti ilə müəyyən olunur.

 

Pasiyent məmnunluğunun və təhlükəsizliyinin təmin edilməsi, tibbi personal arasında effektiv kommunikasiyanın və peşəkar münasibətlərin gücləndirilməsi məqsədilə bu istiqamətdə maarifləndirici tədbirlərin davam etdirilməsi nəzərdə tutulur.

 

Keyfiyyətli tibbi xidmət peşəkarlıqdan, etik davranışdan və pasiyentə göstərilən diqqət və qayğıdan başlayır.