Cəmi 21 günlük, 4 kiloqram çəkisi olan oğlan uşağı böyrəklərinin funksiyasını itirmək təhlükəsi ilə üzləşib. Doğulduğu gündən qızdırma və sepsis səbəbindən xəstəxanada müalicə alan körpənin vəziyyətinin ağırlaşmasına sidik yollarındakı infeksiya və sidiyin sidik kisəsindən böyrəklərə geri qayıtmasına səbəb olan vezikoureteral reflüksün yol açdığı müəyyən edilib.

Aztibb.az xəbər verir ki, uroloq-cərrah Günel Əmiraslanovanın sözlərinə görə, Mərkəzi Klinikanın neonatoloqları ilə birgə aparılan müayinələr və araşdırmalar nəticəsində körpənin vəziyyətinin əsas səbəbi üzə çıxarılıb. Sidiyin sidik kisəsindən sidik axarları vasitəsilə böyrəklərə geri qayıtması infeksiyanın yuxarı sidik yollarına yayılmasına və böyrəklərin zədələnməsi riskinin artmasına səbəb ola bilər.

Həkimin bildirdiyinə görə, dərman müalicəsinə baxmayaraq problemin davam etməsi cərrahi müdaxiləni zəruri edib. Cəmi 21 günlük və 4 kiloqram çəkisi olan körpə üzərində ureterokutanostomiya əməliyyatı həyata keçirilib. Əməliyyat uğurla başa çatıb və körpə xəstəxanadan evə buraxılıb.

Ureterokutanostomiya sidik axarının dəri səthinə çıxarılması yolu ilə sidiyin xaricə axmasını təmin edən cərrahi müdaxilədir. Belə əməliyyatlar müəyyən hallarda sidiyin böyrəklərə geri qayıtmasının və sidik yollarında yaranan təzyiqin fəsadlarının qarşısını almaq məqsədilə tətbiq olunur. Konkret xəstədə bu üsulun seçilməsi isə klinik vəziyyət və müayinələrin nəticələri əsasında müəyyən edilir.

Günel Əmiraslanova körpənin müalicəsində iştirak edən Mərkəzi Klinikanın bütün əməkdaşlarına təşəkkürünü bildirib.