Ağız qoxusu yalnız ağız boşluğunun gigiyenası və ya diş xəstəlikləri ilə əlaqələndirilməməlidir. Ağız boşluğunda səbəb müəyyən edilmədikdə, xüsusilə yanaşı həzm sistemi şikayətləri olan pasiyentlərdə mədə-bağırsaq sisteminin səbəbləri də nəzərdən keçirilməlidir.
Bu barədə Aztibb.az-a ümumi cərrah, cərrah-proktoloq, t.ü.f.d. Anar Əliyev məlumat verib.
Həkim bildirib ki, ağız qoxusu Helicobacter pylori infeksiyası, qastroezofageal reflüks xəstəliyi (GERD) və bəzi digər yuxarı həzm sistemi patologiyaları ilə əlaqəli ola bilər. İltihabi bağırsaq xəstəliklərində — Kron xəstəliyi və xoralı kolitdə də ağız boşluğunda müxtəlif dəyişikliklər və halitoz(ağızda qoxu) müşahidə oluna bilər.
Onun sözlərinə görə, ağız qoxusu aşağıdakı şikayətlərlə birlikdə müşahidə olunursa, səbəbin yalnız dişlərdə axtarılması kifayət etməyə bilər:
• ürək yanması və turşunun ağıza gəlməsi
• turş və ya xoşagəlməz dad
• tez-tez gəyirmə
• epiqastral nahiyədə ağrı və ya diskomfort
• köp, erkən doyma, həzmsizlik
• ürəkbulanma
• qarında ağrı və şişkinlik
• ishal və ya nəcis ifrazında davamlı dəyişikliklər
• səbəbsiz çəki itkisi.
"Xüsusilə ağız qoxusu davamlıdırsa və stomatoloji müayinədə səbəb aşkarlanmayıbsa, anamnez, fiziki müayinə və klinik göstərişlərə uyğun laborator və endoskopik müayinələrlə səbəbin araşdırılması məqsədəuyğundur", - deyə Anar Əliyev əlavə edib.
