İnsanlar getdikcə daha çox mühüm bacarıqlardan birini – qərarvermə qabiliyyətini süni intellektə həvalə edəcəklər.

Aztibb.az xəbər verir ki, "Life" portalına müsahibəsində bu proqnozu fantast yazıçı Çen Tsyufan səsləndirib.

Onun sözlərinə görə, texnologiyaların inkişaf tarixi göstərir ki, daha rahat və əlverişli vasitə ortaya çıxdıqda insan müəyyən bacarıqlardan əvvəlki qədər istifadə etməməyə başlayır.

Əvvəlcə kalkulyatorlar insanın zehindən hesablamalar aparmaq ehtiyacını azaltdı, daha sonra GPS naviqasiya sistemləri marşrutları yadda saxlamaq zərurətini, demək olar ki, aradan qaldırdı. Çen Tsyufanın fikrincə, növbəti mərhələdə müstəqil yazı yazmaq bacarığı, daha sonra isə qərarvermə qabiliyyəti də texnologiyaya ötürülə bilər.

“İstənilən alət nəyisə bizdən alır, eyni zamanda başqa bir qabiliyyətimizi genişləndirir”, – deyə yazıçı qeyd edib.

Bununla belə, Çen Tsyufan bu prosesi birmənalı şəkildə mənfi qiymətləndirmir. Onun fikrincə, əsas məsələ insanın texnologiyaya ötürülən funksiyalar nəticəsində azad olan vaxt və intellektual resursdan necə istifadə edəcəyidir.

Fantast yazıçının fikrincə, süni intellektin geniş yayılmasının nəticələri yalnız neyroşəbəkələrin imkanlarından deyil, həm də müəyyən funksiyaların maşınlara ötürülməsindən sonra insanın hansı bacarıqlarının hələ də tələb olunacağından asılı olacaq.

Süni intellekt artıq tibbi görüntülərin təhlili, diaqnostik qərarların dəstəklənməsi, xəstəlik risklərinin qiymətləndirilməsi və tibbi məlumatların emalı kimi istiqamətlərdə geniş imkanlar yaradır. Lakin qərarvermənin müəyyən hissəsinin süni intellektə ötürülməsi həkimin peşəkar məsuliyyətini və insan amilini aradan qaldırmamalıdır. Tibbdə əsas məsələ süni intellektin insanı əvəz etməsi deyil, onun həkimin qərarverməsini daha dəqiq və effektiv şəkildə dəstəkləyən vasitəyə çevrilməsidir.