29 sentyabr – Dünya Ürək Günü və 1 oktyabr – Beynəlxalq Ahıllar Günü münasibətilə Azərbaycan Ürək və Damar Cərrahiyyəsi Cəmiyyətinin üzvlərindən ibarət həkim briqadası Bilgəh qəsəbəsində yerləşən Ahıl şəxslər üçün sosial xidmət müəssisəsini ziyarət edib.
Bu məlumat Aztibb.az-a Cəmiyyətdən verilib.
Bildirilib ki, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin nəzdində fəaliyyət göstərən müəssisədə yaşayan ahıl şəxslərin ürək-damar sağlamlığının qiymətləndirilməsi məqsədilə Mərkəzi Klinik Xəstəxananın kardioloqlarından ibarət həkim briqadası tərəfindən tibbi müayinələr həyata keçirilib.
Aksiya çərçivəsində 50-dən artıq ahıl şəxsin kardioloji müayinəsi aparılıb. Müayinələr zamanı arterial təzyiq ölçülüb, exokardioqrafik müayinələr keçirilib və müayinələrin nəticələrinə əsasən hər bir şəxs üçün müvafiq müalicə kursu müəyyənləşdirilib.
Təyin olunan müalicənin davamlılığının təmin edilməsi məqsədilə reseptlərə uyğun ilkin dərman təminatı KRKA şirkətinin dəstəyi ilə həyata keçiriləcək.
Qeyd edək ki, Azərbaycan Ürək və Damar Cərrahiyyəsi Cəmiyyəti tərəfindən Dünya Ürək Günü çərçivəsində ürək-damar xəstəliklərinin profilaktikası, erkən diaqnostikası və ürək sağlamlığı ilə bağlı maarifləndirməyə yönəlmiş sosial və tibbi tədbirlər mütəmadi olaraq həyata keçirilir.
Bilgəhdə keçirilən aksiya da ürək-damar sağlamlığına diqqətin artırılması və ahıl şəxslərin vaxtında kardioloji müayinələrə cəlb olunması məqsədinə xidmət edib.
