Moskva vilayətində həkimlər sürətli böyümə nəticəsində sağ əlinin baş barmağında deformasiya yaranan qız uşağını əməliyyat ediblər.

Aztibb.az "Life" portalına istinadən xəbər verir ki, valideynləri uşağın əlində forma dəyişikliyi müşahidə etdikdən sonra onu müayinəyə aparıblar. Müayinə zamanı intensiv toxuma inkişafı nəticəsində baş barmağın normal vəziyyətindən kənara çıxdığı və barmaqla yanaşı barmaq arasındakı məsafənin daraldığı müəyyənləşib. Bu vəziyyət uşağa narahatlıq yaradır və əl funksiyalarının pozulması riski daşıyırdı.

Mütəxəssislər bildiriblər ki, uşaqlarda hətta kiçik anatomik dəyişikliklər də böyümə prosesində sürətlə dərinləşə bilər. Vaxtında müdaxilə edilmədikdə ağrı, incə motorikanın və hərəkət koordinasiyasının pozulması, eləcə də hərəkət məhdudiyyəti yarana bilər.

Həkimlər əməliyyat zamanı barmaqlar arasındakı sahənin plastikasını həyata keçirərək baş barmağın anatomik quruluşunu bərpa ediblər. Müdaxilə gələcək fəsadların və daha mürəkkəb əməliyyata ehtiyacın qarşısını almağa imkan verib.

Kiçik pasiyent artıq evə buraxılıb. Onun əl funksiyasının tam bərpası üçün ambulator şəraitdə reabilitasiya davam etdiriləcək.