Dünyada qadınlar arasında ən çox rast gəlinən xərçəng növü olan döş xərçəngi son illər gənc yaşlarda da daha çox diqqət çəkir. Türkiyədə hər il təxminən 27 min qadına bu xəstəlik diaqnozu qoyulur.

Aztibb.az "Posta" saytınamistinadən yazır ki, mütəxəssislər erkən diaqnozun müalicənin uğurunda mühüm rol oynadığını bildirirlər. Ümumi cərrahiyyə mütəxəssisi Prof. Dr. Metin Çakmakçı qeyd edir ki, heç bir şikayətin olmaması müayinələri təxirə salmaq üçün əsas deyil. Artıq müasir görüntüləmə üsulları xəstəliyin daha erkən mərhələdə aşkarlanmasına imkan verir.

Döş xərçəngi riskini artıq çəki, menopauzadan sonra piylənmə, fiziki aktivliyin azlığı, siqaret və alkoqol istifadəsi, eləcə də bəzi hormonal müalicələr artıra bilər.

Xəstəliyin diqqət tələb edən əsas əlamətləri döşdə yeni yaranan kütlə, döşün ölçü və formasında dəyişiklik, dəridə çöküklük və ya qalınlaşma, məmə ucunun içəri çəkilməsi, öz-özünə yaranan, xüsusilə qanlı axıntı, döş və məmə ətrafında davamlı qızartı və dəri dəyişiklikləri, qoltuqaltı və ya körpücük sümüyü ətrafında yeni yaranan şişkinlikdir.

Mütəxəssislər vurğulayırlar ki, bu əlamətlərin hər biri mütləq xərçəng demək deyil və müxtəlif xoşxassəli səbəblərlə də bağlı ola bilər. Lakin yeni və davamlı dəyişiklik müşahidə edildikdə həkimə müraciət etmək vacibdir.

Döş xərçənginin skrininq və müayinə proqramı yaş, ailə anamnezi, genetik risk və digər amillər nəzərə alınaraq fərdi şəkildə müəyyənləşdirilməlidir. Xüsusilə ailəsində döş və ya yumurtalıq xərçəngi olan qadınların risk qiymətləndirməsini daha erkən aparmaları tövsiyə olunur.