13 yaşlı Nuray Abdullayeva güclü qarın ağrısı ilə Qazax Rayon Mərkəzi Xəstəxanasına müraciət edib. Məlum olub ki, yeniyetməyə vaxtında müdaxilə edilmədiyi üçün vəziyyət ağırlaşıb. Appendiks partlayıb, qarın boşluğunda iltihab yayılıb və sepsis (qanın zəhərlənməsi) baş verib.

 

 

Bildirilib ki, cərrah Sarif Orucov tərəfindən təcili əməliyyat aparılıb. Əməliyyat zamanı qarın boşluğundan təxminən 1,5 litr irinli maye çıxarılıb və appendiks götürülüb. Pasiyent bir müddət Reanimasiya şöbəsində müalicə aldıqdan sonra vəziyyəti stabilləşib və evə buraxılıb.

 

Bu hadisə bir daha göstərir ki, həkim məsləhəti olmadan evdə aparılan müalicə xəstəliyin ağırlaşmasına, müalicənin gecikməsinə və hətta həyati təhlükəyə səbəb ola bilər.

 

Xüsusilə güclü qarın ağrısı, yüksək hərarət, qusma və halsızlıq kimi əlamətlər olduqda vaxt itirmədən həkimə müraciət etmək lazımdır. Evdə özbaşına dərman qəbul etmək və müalicə aparmaq vəziyyəti daha da ağırlaşdıra bilər.