Gəncə Şəhər Birləşmiş Xəstəxanasının (ŞBX) nəzdində fəaliyyət göstərən tibb müəssisələrində "Tibb işçilərinin peşəkar davranış qaydaları" mövzusunda maarifləndirici təlimlər davam etdirilir.

Gəncə ŞBX-dan Aztibb.az-a bildirilib ki, növbəti belə tədbir Z.Məmmədov adına xəstəxanada baş tutub. Təlimdə sözügedən tibb müəssisələrinin orta və kiçik tibb işçiləri iştirak edib. Gəncə ŞBX-nin Tibb bacıları şöbəsinin müdiri Güney Əzizova və Keyfiyyətə nəzarət üzrə məsul şəxs, təlim koordinatoru Ənvər Abbasov tərəfindən təşkil olunan tədbirdə tibbi xidmətin keyfiyyətinin yüksəldilməsi istiqamətində vacib məqamlar müzakirə olunub.

Təlimçilər tərəfindən xidmət keyfiyyətinin artırılmasında peşəkar davranış qaydalarının tibbi xidmətin ayrılmaz bir hissəsi olduğu vurğulanıb. Eyni zamanda, iştirakçılara pasiyentlərlə düzgün ünsiyyət qurulması, tibbi etika və deontologiya prinsiplərinə ciddi riayət olunmasının vacibliyi barədə ətraflı məlumat verilib.

İnteraktiv formada keçən təlimin sonunda tibb heyətini maraqlandıran suallar cavablandırılıb və mövzu ətrafında geniş fikir mübadiləsi aparılıb.