Azərbaycan Tibb Universitetinin (ATU) Nevrologiya kafedrasının nümayəndələri Özbəkistanın paytaxtında keçirilən beynəlxalq elmi tədbirdə Azərbaycanın müasir neyrogenetika sahəsində elmi potensialını təqdim ediblər.
Aztibb.az-a verilən xəbərə görə, Daşkənd şəhərində baş tutan “Müasir Neyrogenetika: Genomdan Terapiyaya” adlı Beynəlxalq Elmi-Praktik Konfransda ATU-nu Nevrologiya kafedrasının professoru Aytən Məmmədbəyli, kafedranın assistenti Mədinə Tağıyeva və dissertantı Yaqut Hüseynli təmsil edib.
Universitet nümayəndələri konfransın elmi proqramında fəal iştirak edərək nevrologiya və neyrogenetikanın aktual istiqamətlərinə həsr olunmuş elmi məruzələrlə çıxış ediblər.
Konfrans müasir neyrogenetikanın ən aktual məsələlərinin müzakirə edildiyi beynəlxalq elmi platformalardan biri kimi diqqət çəkib. Tədbirdə nevrogenetik xəstəliklərin molekulyar-genetik əsasları, müasir diaqnostika imkanları, genomik tədqiqatların nəticələrinin klinik praktikaya tətbiqi və yeni terapevtik yanaşmalar ətrafında geniş fikir mübadiləsi aparılıb.
Nevrologiya və neyrogenetika sahəsində aparılan araşdırmaların beynəlxalq platformalarda təqdim edilməsi, əldə olunan elmi nəticələrin müzakirəyə çıxarılması və yeni elmi əlaqələrin qurulması ATU-nun müasir tibb elminin inkişafına verdiyi töhfələrin mühüm istiqamətlərindən biridir.
