İnquşetiyanın Respublika Klinik Perinatal Mərkəzinin cərrahları bağırsağın çoxsaylı atreziyası ilə doğulan vaxtından əvvəl doğulmuş körpə üzərində səkkiz saat davam edən mürəkkəb əməliyyat keçiriblər.

Aztibb.az "Life" portalına istinadən yazılr ki, körpə hamiləliyin 33-cü həftəsində, 2,25 kiloqram çəki ilə dünyaya gəlib. Müayinə zamanı onun bağırsağında eyni vaxtda 25 nahiyədə keçməzlik aşkarlanıb.

Körpədə 10 tam atreziya, həmçinin bağırsağın mənfəzini bağlayan 15 membran müəyyən edilib. Cərrahlar orqanın mümkün qədər böyük hissəsini qorumaq qərarına gəlib və 10 bağırsaq anastomozu formalaşdırıblar. Nəticədə körpənin təxminən 80 santimetr nazik bağırsağını qorumaq mümkün olub.

Əməliyyatdan cəmi üç gün sonra körpədə müstəqil nəcis ifrazı başlayıb. On aylıq olarkən isə uşaq tamamilə enteral qidalanmaya, yəni süni qarışıq və əlavə qidaya keçib.

Perinatal mərkəzdə körpənin hazırkı vəziyyəti uzunmüddətli cərrahi müalicə və sonrakı reabilitasiyanın uğurlu nəticəsi kimi qiymətləndirilir.