Xəstəxanadan Aztibb.az-a bildirilib ki, avqustun 2-də ağır vəziyyətdə Respublika Klinik Xəstəxanasının Anesteziologiya, Reanimasiya və İntensiv Terapiya şöbəsinə hospitalizasiya olunan qadın pasiyentə aparılan instrumental və laborator müayinələrin nəticələrinə əsasən L51.2 – Toksik Epidermal Nekroliz (Layell sindromu) diaqnozu qoyulub.

 

Pasiyentin vəziyyətinin ağırlığı nəzərə alınaraq bir sıra tibb müəssisələrinə müraciət edilsə də, onun qəbulunda çətinliklər yaranıb. Nəticədə pasiyent Respublika Klinik Xəstəxanasına hospitalizasiya olunaraq burada zəruri ixtisaslaşmış tibbi yardım göstərilib.

 

Pasiyent 2–17 avqust tarixlərində Anesteziologiya, Reanimasiya və İntensiv Terapiya şöbəsində həkim-anestezioloq-reanimatoloq Nərmin Məhərrəmovanın, həmçinin Allerqologiya şöbəsinin müdiri Reyhan Paşayevanın və həkim-allerqoloq Aysel Bayramovanın birgə nəzarəti altında intensiv müalicə alıb.

 

Aparılan kompleks müalicə nəticəsində pasiyentin vəziyyətində müsbət dinamika müşahidə olunub. 17 avqustda müalicənin növbəti mərhələsinin davam etdirilməsi məqsədilə Allerqologiya şöbəsinə köçürülən pasiyent burada Reyhan Paşayevanın və Aysel Bayramovanın nəzarəti altında 10 günlük müalicə kursu keçib.

 

Göstərilən kompleks və ixtisaslaşmış tibbi yardım nəticəsində pasiyentin sağlamlıq vəziyyəti əhəmiyyətli dərəcədə yaxşılaşıb və stabilləşib. 28 avqustda pasiyent ambulator müalicəni davam etdirmək üçün evə buraxılıb.

 

Pasiyent göstərilən yüksək ixtisaslı tibbi yardım, peşəkar yanaşma və qayğıya görə həkimlərə, eləcə də Respublika Klinik Xəstəxanasının bütün tibb personalına təşəkkürünü bildirib.